O PSOE de Arteixo esixe a retirada dos símbolos franquistas en fontes e lavadouros de Suevos e Loureda
No último pleno municipal, o Grupo Municipal Socialista de Arteixo presentou un rogo para que se retiren as referencias e emblemas franquistas que permanecen en fontes e lavadouros públicos das parroquias de Suevos e Loureda, en cumprimento do establecido pola Lei de Memoria Democrática.
Martín Seco, voceiro do PSOE en Arteixo, recordou que a normativa estatal obriga ás administracións locais a suprimir elementos que poidan exaltan a ditadura ou a sublevación militar, e sinalou que a presenza destes símbolos nos espazos públicos afecta á memoria das persoas e á convivencia democrática da comunidade.
O grupo de goberno do PP respondeu na sesión argumentando que a cuestión podería abrir un debate máis amplo sobre outros elementos históricos ou asistenciais, e comparou a retirada dos símbolos con medidas tan dispares como a supresión de pagas extras de verán, a conservación de presas construídas en épocas anteriores ou cuestións relativas a seguros de saúde. Esa intervención xerou unha discrepancia pública entre ambos grupos: o PSOE considerou a comparación pouco axeitada, mentres que o PP defendeu que quere evitar actuacións apresuradas sen un estudo previo.
Desde o Grupo Socialista piden que se inicien os trámites administrativos para proceder á retirada das referencias franquistas destes bens públicos, lembrando que a Lei de Memoria Democrática establece que este tipo de símbolos non teñen cabida en edificios nin elementos visibles ao público. Ao mesmo tempo, instan ao diálogo para abordar a cuestión de forma coordinada e con criterios técnicos que garantan o correcto tratamento do patrimonio e da memoria local.