O PSdeG pide garantías á Xunta de Galicia ante as “graves deficiencias” no CHUAC
A deputada socialista Silvia Longueira denunciou este xoves a situación crítica que atravesa o Complexo Hospitalario Universitario A Coruña (CHUAC), responsabilizando á Xunta de Galicia pola “desorganización e falta absoluta de planificación” tanto nas obras en curso como na xestión diaria do hospital.
Segundo Longueira, na cuarta planta do CHUAC algúns pacientes están a ser atendidos en corredores abertos, sen acceso a osíxeno nin vixilancia constante, ademais de estar expostos a conversacións clínicas e coidados en zonas de paso. Pola súa banda, na UCI da quinta planta, a falta de espazo obriga a sacar camas aos corredores para ingresar novos pacientes, en habitacións sen fiestras, o que dificulta a protección da intimidade e o coidado axeitado de enfermos críticos.
Ademais, a deputada denunciou problemas “moi graves” no servizo de comidas: desde 2021 non se cobren as prazas de técnico superior en dietética, o que deixa sen supervisión profesional a maioría das dietas e obriga a persoal non cualificado a asumir funcións delicadas, incluíndo a modificación de pedidos sen autorización e o acceso a historias clínicas. Tamén se detectaron fallos relacionados coas obras, como a falta de separación de carros para pacientes alérxicos.
Longueira sinalou que a reforma do CHUAC, prevista pola Xunta ata 2031, segue adiante “sen un plan de provisionalidade coñecido polo persoal”, sen reunións, documentación nin instrucións claras sobre o impacto das obras na atención sanitaria.
Entre as demandas presentadas, o PSdeG reclama un informe parlamentario sobre o servizo de comidas, a creación e cobertura inmediata das prazas de dietista, un procedemento claro para informar ao persoal e unha reorganización dos ingresos para garantir “a seguridade e a intimidade dos pacientes”.
A deputada concluíu que “o que está a pasar no CHUAC non responde a un problema puntual nin a unha situación inevitable das obras: responde á falta de dirección da Xunta” e reclamou que o Goberno galego “ten a obriga de actuar de inmediato” para asegurar unhas condicións mínimas para os pacientes.