O PSdeG de Carral reclama información a tres administracións sobre o cambio de uso do solo en Os Capelos
O PSdeG-PSOE de Carral deu un paso máis na súa labor de control da xestión municipal ao solicitar información formal a tres administracións sobre a modificación do planeamento urbanístico no ámbito do Polígono de Os Capelos. O grupo socialista quere esclarecer como avanza o proceso que permitiría cambiar o uso dun solo inicialmente previsto como residencial para convertelo en industrial.
A iniciativa foi impulsada pola voceira socialista, Patricia Blanco Fidalgo, que rexistrou solicitudes ante o Concello de Carral, a Dirección Xeral de Urbanismo da Xunta de Galicia e a entidade pública empresarial SEPES, dependente do Ministerio de Vivenda e Axenda Urbana. Esta última figura no procedemento ao participar na promoción orixinal do polígono como unha actuación mixta de solo industrial e residencial.
Nas peticións presentadas, o PSdeG demanda acceso a información actualizada e detallada sobre todas as actuacións realizadas polas administracións implicadas. Entre a documentación requirida figuran informes técnicos, xurídicos, urbanísticos e ambientais, ademais de resolucións adoptadas, posibles requirimentos trasladados ao Concello e o estado actual da tramitación.
Os socialistas tamén poñen o foco no papel de SEPES dentro do proceso. En concreto, solicitan coñecer se a entidade deu o seu visto e prace formal ao cambio de uso do solo, en que termos se produciría ese consentimento, cal é a titularidade actual dos terreos afectados e que previsións existen para o desenvolvemento futuro desta área.
Patricia Blanco Fidalgo sostén que se trata dunha actuación con impacto no futuro económico e territorial do municipio, polo que considera necesario extremar a transparencia. A portavoz defende que a oposición debe contar con toda a información para exercer con rigor as súas funcións de control e fiscalización e para comprobar que os intereses xerais de Carral quedan salvagardados.
Desde o PSdeG de Carral avanzan que, unha vez reciban a documentación solicitada, analizarán o alcance real da modificación urbanística e as posibles consecuencias que este cambio poida ter para o concello.