O PSdeG acusa a Alternativa dos Veciños de persecución política contra exedís socialistas
O PSdeG de Oleiros denuncia que Alternativa dos Veciños (AAVV), formación que lidera o goberno municipal, pretende “amedrentar e intimidar” á oposición ao impulsar unha reclamación patrimonial contra exconcelleiros socialistas que formaron parte da Corporación durante o mandato 2019-2023.
Segundo explican os socialistas, a medida adoptada por AAVV supón “un novo episodio dentro da estratexia do alcalde para crear un clima de medo e persecución política, máis propio de réximes autoritarios que dunha democracia local”.
O PSdeG critica que a reclamación patrimonial por 18.000 euros, relativa a gastos de funcionamento do grupo municipal socialista (375 euros mensuais durante catro anos), se leve ao Pleno malia existir unha sentenza firme que invalidou o procedemento seguido inicialmente por AAVV. “En lugar de reiniciar correctamente o proceso, como permite a resolución xudicial, o goberno salta os pasos necesarios e diríxese directamente contra o patrimonio persoal dos exconcelleiros”, denuncian.
Para os socialistas, esta actuación é “un aviso a navegantes” para quen pretenda facer oposición: “Non lles abonda con acosarte mentres estás na Corporación, tamén che perseguen despois”.
O grupo socialista lembra que eses fondos foron destinados ao pago de alugueiro e subministracións dunha sede, gastos coñecidos tanto polo alcalde como polo resto da Corporación. Contrapóñeno cos fondos recibidos por AAVV no mesmo período: máis de 17.000 euros anuais en gastos de funcionamento, ademais duns 800.000 euros anuais en salarios para os seus concelleiros e sete asesores contratados “a dedo”, o que supón un total duns 2,5 millóns de euros nos catro anos.