O programa PEL ACTIVA da Deputación formará a 228 persoas en sectores de alta demanda
A Deputación da Coruña recibiu unha subvención de 1.172.860 euros do Fondo Social Europeo Plus (FSE+) para poñer en marcha o programa PEL ACTIVA, unha ambiciosa iniciativa de formación que busca mellorar a empregabilidade na provincia. O programa, cun custo total de case dous millóns de euros, capacitará a 228 persoas en sete sectores de alta demanda, especialmente no ámbito rural.
O 75% do alumnado serán mulleres, reforzando así o compromiso da Deputación coa igualdade de xénero no mercado laboral. Entre os itinerarios formativos inclúense:
- Atención sociosanitaria a persoas no domicilio
- Atención sociosanitaria a persoas dependentes en institucións sociais
- Montaxe e mantemento de instalacións solares fotovoltaicas
- Actividades de xestión administrativa
- Guía por itinerarios de baixa e media montaña
- Agricultura de precisión
- Montaxe e postproducción de audiovisuais
Este proxecto enmárcase nas políticas activas de emprego da Deputación e foi deseñado para responder á crecente demanda de persoal cualificado en sectores como os coidados, que resultan fundamentais no medio rural e nos municipios en reto demográfico. Ademais, priorízase a formación de colectivos con maiores dificultades de acceso ao mercado laboral, como desempregados de longa duración, maiores de 45 anos, persoas con discapacidade e inmigrantes.
O presidente da Deputación destacou que iniciativas como PEL ACTIVA "son clave para fomentar o emprego no rural e promover a igualdade de oportunidades, especialmente no acceso das mulleres a sectores estratéxicos". A subvención permitirá cubrir o 60% dos custos asociados aos cursos, garantindo formación accesible e de calidade.
Os cursos realizaranse en varias localidades da provincia, centrados nos municipios rurais, co obxectivo de facilitar o acceso á formación e aumentar as posibilidades de inserción laboral, especialmente entre os colectivos máis vulnerables.