O proceso de participación de Coruña Marítima continúa coa celebración de cinco talleres
O proceso de participación cidadá do proxecto Coruña Marítima avanza coa organización de cinco talleres temáticos que se celebrarán a partir da vindeira semana, destinados a recabar ideas e opinións sobre o futuro do Porto e da cidade. O primeiro taller terá lugar o martes 25 de marzo ás 17.00 horas no Palacio de Exposicións e Congresos de A Coruña (Palexco), e tratará sobre 'Economía e Innovación'. A entrada será libre até completar o aforo.
O seguinte taller será o mércores 26 de marzo no centro Hi Coruña, tamén ás 17.00 horas, centrado na temática de 'Mobilidade e transporte'. O ciclo continuará os días 1, 2 e 3 de abril no Palexco, onde se celebrarán os últimos tres talleres sobre as seguintes áreas: 'Equipamento e Usos' (1 de abril), 'Actividade Portuaria' (2 de abril) e 'Ecoloxía, Medio Ambiente, Auga e Enerxía' (3 de abril), todos ás 17.00 horas.
Estes talleres contarán coa participación de expertos e entidades especializadas en cada unha das temáticas, pero estarán abertos ao público en xeral, sen necesidade de inscrición previa. A Comisión Coruña Marítima, composta polo Concello da Coruña, Xunta de Galicia, Ministerio de Transportes y Mobilidade Sostible, Puertos del Estado, ADIF e a Autoridade Portuaria, fai un chamamento aos cidadáns para que se unan a este proceso participativo e acheguen as súas propostas sobre o que precisa o Porto e a cidade no futuro.
Na páxina web oficial, tamén continúa aberto un "buzón" de suxestións, no que xa se recibiron máis de 40 propostas de todo tipo. A maioría destas achegas teñen un carácter construtivo, pedindo a incorporación de equipamentos sociais, culturais, recreativos ou deportivos, así como melloras na mobilidade e outras propostas de desenvolvemento.
O proceso participativo tamén inclúe a distribución das Bases Estratéxicas do proxecto a máis de 900 colectivos, entidades e institucións, co obxectivo de recoller achegas e suxestións para mellorar o Máster Plan que definirá o futuro dos espazos do porto interior. Este proceso involucra a asociacións sociais e culturais, empresas portuarias, institucións públicas e privadas, grupos ecoloxistas, universidades e moitas outras entidades.
En breve, tamén se convocará un concurso internacional multidisciplinar para definir o Máster Plan que rexirá a transformación dos espazos portuarios e ferroviarios. Este plan debe ser propositivo, flexible e innovador, cunha visión a medio e longo prazo, e contemplará distintos escenarios de desenvolvemento para garantir un futuro sostible e eficiente para o Porto de A Coruña e a súa contorna. Os cidadáns están convidados a seguir participando neste proceso, aportando as súas ideas e propostas para construir entre todos un futuro mellor para o Porto e a cidade.