O PP pide un plan integral para Os Mallos ante as queixas por inseguridade, aparcadoiro e mantemento
O portavoz do Grupo Popular no Concello da Coruña, Miguel Lorenzo, mantivo un encontro con veciños do barrio dos Mallos, que lle trasladaron a súa preocupación pola falta de resposta do Goberno municipal a problemas que, segundo sinalan, levan anos sen resolverse. Entre as principais queixas figuran a sensación de inseguridade, as dificultades para aparcar e o escaso mantemento do espazo público, malia ás mocións aprobadas por unanimidade no pleno.
No ámbito da seguridade, os residentes mostraron a súa inquietude polos problemas de convivencia e orde pública vinculados ao edificio situado no número 137 da ronda de Outeiro, así como polos conflitos relacionados co tráfico de drogas nas rúas Ramón Cabanillas e Vizcaya. Lorenzo lembrou que estes asuntos xa foron denunciados polos propios veciños e debatidos en sesión plenaria, e criticou que, ao seu xuízo, o Executivo local non activase medidas contundentes para mellorar a situación.
Outro dos puntos que máis preocupa ao barrio é a perda de prazas de estacionamento. Os veciños aseguran que a eliminación de espazos para aparcar na avenida da Sardiñeira, na rúa Ramón Cabanillas ou na praza Padre Rubinos, sen alternativas claras, obrígaos a dar voltas durante moito tempo para atopar sitio, nunha zona onde a maioría dos edificios non dispoñen de garaxe propio.
A isto súmase, segundo apuntan, a falta de mantemento en diferentes elementos urbanos: beirarrúas deterioradas, iluminación insuficiente, deficiencias na limpeza e coidado das zonas verdes. Consideran que a suma de todos estes factores empeora a calidade de vida no barrio e fai necesario un cambio de rumbo na actuación municipal.
Lorenzo sostén que Os Mallos levan seis anos agardando solucións que non chegan e defende que os problemas do barrio non se poden abordar con actuacións puntuais, senón cun plan municipal específico que inclúa medidas en materia de seguridade, mobilidade, limpeza e conservación do espazo público. O portavoz popular pediu á alcaldesa, Inés Rey, que priorice este barrio na planificación municipal e que abra un diálogo estable coa veciñanza para consensuar as actuacións.