O PP lembra as mocións de censura que levaron a García Seoane á alcaldía nos anos 80
O Partido Popular de Oleiros puxo en contexto as recentes declaracións do alcalde, Ángel García Seoane, sobre as mocións de censura que se produciron en Fisterra e Carral. Os populares lembran que o actual rexedor accedeu á alcaldía de Oleiros en dúas ocasións a través desta mesma vía nos anos oitenta.
Segundo apuntan, a primeira moción produciuse en 1981, cando Seoane, daquela número dous da candidatura veciñal, promoveu unha iniciativa contra o alcalde Xosé Lois Martínez. A segunda, en 1985, tivo lugar xa como líder de Alternativa dos Veciños, contando co apoio de diferentes forzas políticas e dun sector dos concelleiros socialistas, o que lle permitiu converterse en alcalde, posto que ocupa desde entón.
Para o PP, estes antecedentes históricos amosan unha traxectoria política marcada polo uso das mocións de censura, polo que consideran que as críticas actuais de García Seoane a este tipo de iniciativas deben analizarse á luz da súa propia experiencia.