O PP denuncia a inacción do Goberno local fronte aos narcopisos en varios barrios da Coruña
O Grupo Popular da Coruña rexistrou unha pregunta oral para o pleno municipal do vindeiro 11 de setembro, co obxectivo de coñecer cales son as medidas que o Goberno local está a adoptar ante as reiteradas denuncias veciñais pola presenza de narcopisos en diferentes barrios da cidade.
Esta semana, residentes da Sagrada Familia saíron á rúa para expresar o seu malestar polos problemas de inseguridade e convivencia xerados por un destes pisos. 'Non me gustan estas mobilizacións, pero a veciñanza vese obrigada a protestar pola pasividade do Concello e da Delegación do Goberno', apuntou o voceiro popular, Miguel Lorenzo, quen ademais acusou a alcaldesa Inés Rey de 'eludir responsabilidades' e de derivar toda a acción na Policía Nacional, 'coma se a Policía Local non puidese actuar'.
O PP lembra que a preocupación non se limita á Sagrada Familia, senón que se estende a zonas como Os Mallos (rúa Vizcaya e Ramón Cabanillas), O Castrillón ou Agra do Orzán (rúa Laracha), entre outras, onde ademais do tráfico de drogas rexístranse pelexas, sucidade e danos materiais en espazos comúns.
Ante esta situación, Lorenzo reclamou unha maior presenza policial nas rúas, a posta en marcha dun protocolo de coordinación entre Corpos e Forzas de Seguridade, un incremento do número de axentes tanto na Policía Local como na Nacional e a recuperación da Policía de Barrio. 'Estes son os asuntos que afectan no día a día á cidadanía coruñesa e que Inés Rey debería atender en lugar de falar de grandes proxectos que nunca executa', concluíu.