O PP de Sada esixe a convocatoria urxente da comisión de seguridade cidadá
O Partido Popular de Sada vén de rexistrar no Concello unha solicitude formal para que o alcalde convoque “con carácter urxente” a comisión especial de seguridade cidadá. A formación popular advirte do incremento da intranquilidade entre a veciñanza tras unha serie de feitos que inclúen roubos con pasamontañas, pintadas que marcan territorio, incendios de colectores e a proliferación de narcopisos.
“Necesitamos máis policía na rúa, nas parroquias, máis seguridade”, subliñan desde o PP local, especialmente tras o último incidente rexistrado este luns ao redor das nove da noite, cando un incendio nun piso céntrico deixou ao descuberto sustancias estupefacientes e a posibilidade de que alí se desenvolvese un negocio ilegal de tráfico de drogas.
Os populares tamén critican a actitude do Goberno local, acusando á concelleira de seguridade, Pilar Taibo, de minimizar a gravidade da situación. “Este é o goberno das escusas... e o que Sada e os veciños necesitan son solucións”, afirmou a voceira do grupo municipal do PP, Esperanza Arias.
Arias denunciou tamén a inacción do executivo municipal: “O Goberno do señor Portela vese superado, fáiselle máis grande ca nunca este actual mandato, está paralizado, en shock, negando o innegable, insensible, desconectado da realidade dos veciños”.
Desde o PP lembran que foi a súa formación quen promoveu no seu momento a creación da comisión especial de seguridade cidadá, que contou co apoio unánime de todos os grupos da corporación, e que levan máis dun ano sen ser convocada, a pesar de que se acordara facelo de forma periódica.
“Dicir que non hai policía suficiente non é a resposta que agardan os veciños. Necesitan saber que a súa seguridade é un tema prioritario para o goberno e que se van tomar medidas. É xa unha cuestión de actitude”, concluíu Arias.
O grupo popular adiantou tamén que volverá levar ao próximo pleno as preocupacións dos sadenses, ademais de propoñer melloras nos medios materiais e humanos da Policía Local. Tamén solicitaron unha reunión co corpo policial para coñecer de primeira man as súas necesidades e suxestións ante a situación actual de inseguridade cidadá.