O PP de Culleredo continúa coa súa ronda de encontros veciñais en Fonteculler
O Partido Popular de Culleredo segue co seu ciclo de encontros veciñais 'Rúa a rúa, escoitando', e nesta ocasión foi o turno de Fonteculler, unha das zonas máis poboadas do municipio. A reunión, celebrada no Centro Cívico Virginia Blanco, contou cunha ampla asistencia, segundo indican, e permitiu comprobar o malestar xeneralizado dos veciños ante o desleixo do Goberno local, dirixido por José Ramón Rioboo.
As principais preocupacións trasladadas polas persoas asistentes foron o mal estado das prazas, a inseguridade viaria, o deterioro dos parques infantís, a falta de limpeza e uns servizos que non dan resposta ás necesidades da veciñanza.
Entre as queixas destacaron especialmente as malas condicións da Praza Daniel Rodríguez Castelao, Santa Gema e o Parque das Brañas. "O risco de caídas nestas prazas é altísimo debido aos pavimentos agrietados e sen mantemento. E ademais, nunha zona cunha poboación superior aos 3.000 habitantes, só hai catro columpios e dous tobogáns, e algúns nin sequera son seguros para os nenos", sinalou a portavoz popular, Izaskun García.
A situación do Parque das Brañas tamén foi obxecto de crítica. "Desde que en 2020 se derrumbou a cuberta que estaba a piques de inaugurarse, os restos permaneceron no chan ata 2023, e a día de hoxe, ninguén asumiu responsabilidades. É indignante que os veciños sigan a pagar as consecuencias da incompetencia de Rioboo", subliñou García. "A esta vergonza hai que engadir deficiencias no sistema de pluviais e a desaparición dos pivotes que impedían o acceso de vehículos ao parque, o que aumenta o risco para os peóns", engadiu.
Ademais, a falta de limpeza e mantemento tamén se mencionou como unha das maiores preocupacións. "A acumulación de lixo e a ausencia de desbroce nas zonas xardinadas favorecen a proliferación de ratas, e a acumulación de excrementos de aves na Praza Castelao agrava aínda máis a sensación de abandono na zona", recalca a portavoz popular.
O Centro Cívico onde tivo lugar a reunión tamén foi obxecto de queixas. "É inaceptable que este edificio careza de accesibilidade. Para acceder á planta superior hai que saír ao exterior, o que supón unha barreira para moitas persoas", criticou García.
Diante desta situación, o Partido Popular de Culleredo comprométese a seguir defendendo os intereses da veciñanza e a exixir respostas inmediatas ao goberno municipal. "Non imos deixar de loitar por Fonteculler. Os veciños están fartos do abandono e merecen solucións, non desculpas. Imos seguir aquí, escoitándoos e levando as súas demandas onde faga falta", concluiu Izaskun García.