O PP de Betanzos reclama melloras urxentes na parroquia de Castro
O Partido Popular de Betanzos trasladará ao Concello un conxunto de demandas veciñais relacionadas co mantemento, mellora de infraestruturas e servizos que levan tempo sendo reclamadas polos residentes da parroquia de Castro. A voceira popular, Cecilia Vázquez, recolleu estas peticións durante un recente percorrido pola zona, onde conversou directamente cos afectados.
Entre as principais reivindicacións atópase a revisión e ampliación de camiños estreitos, ademais do seu mantemento regular, con especial atención á pista que une Betanzos con Miodelo, en Bergondo. O perigo de desprendemento de árbores en varias pistas da parroquia é outra das preocupacións manifestadas polos veciños, así como a carencia de sinalización axeitada e medidas de seguridade viaria.
Outra das necesidades urxentes é a limpeza de arcenes e cunetas, xa que a ausencia de beirarrúa en moitos tramos de vías con importante tráfico rodado pon en risco a seguridade peonil. Ademais, a carencia de fibra óptica na zona é unha das reclamacións máis repetidas polos residentes, que demandan melloras na conectividade.
No que respecta ás infraestruturas de uso común, o PP considera imprescindible a reparación, limpeza e coidado do local social e da súa parcela. Tamén se require unha intervención inmediata no aparcadoiro da igrexa e do cemiterio da parroquia, que presenta un afundimento parcial do firme. Ademais, a pista polideportiva da zona atópase en estado de abandono, sendo xa intransitable.
O grupo municipal popular tamén insiste na necesidade de que o Concello esixa a limpeza de fincas abandonadas e facilite o acceso á construción de vivendas para favorecer o asentamento de nova poboación. Ademais, solicitan unha maior frecuencia na recollida de residuos domésticos, como medida fundamental para mellorar a calidade de vida da veciñanza e fomentar un desenvolvemento sostible na parroquia.