O PP de Betanzos propón nomear os parques infantís con nomes de mulleres destacadas da vila
O Partido Popular de Betanzos traslada que presentou unha proposta na Comisión de nomenclator para que os parques infantís da localidade leven o nome de mulleres brigantinas coñecidas polo seu traballo e dedicación. Actualmente, estes espazos de lecer infantil son identificados pola súa localización, pero carecen dunha denominación oficial. A iniciativa dos populares busca humanizar estas áreas de xogo, recoñecendo a figuras femininas e entidades formadas por mulleres comprometidas con Betanzos en diversos ámbitos.
A portavoz do PP, Cecilia Vázquez, destacou que “das 162 rúas de Betanzos, só 16 levan nome de muller, unha razón que xustifica a nosa proposta para os parques infantís”. Vázquez engadiu que “desta maneira, humanizamos os espazos públicos e damos a oportunidade de que a infancia coñeza desde pequena a mulleres brigantinas relevantes”. Así mesmo, enmarcou esta proposta como unha contribución ao 8M e ao compromiso do partido coa igualdade, lembrando tamén a súa iniciativa de promover a Obdulia González Novoa como candidata ao premio Úrsula Meléndez de Texeda.
Entre os nomes propostos inclúense figuras destacadas como Marisa Couceiro, doutora en Farmacia que rexentou durante décadas a farmacia familiar fundada en 1719; Carmiña Fuentes (Chelas), comerciante de roupa con varios establecementos en Betanzos; Elena Gómez (Sinuessa), propietaria xunto ao seu marido da primeira pizzería aberta na vila hai máis de 30 anos; ou Carmen Porcas, dona do desaparecido Bar O Pepé, un referente da cociña tradicional.
A lista inclúe tamén a mulleres vinculadas ao comercio e a hostalaría, como Mary Carmen Presas, que dirixiu o Pub Saco e foi vicepresidenta da Federación de Peñas do Deportivo na época dourada do club; Marujita Barallobre, mestra e fundadora de La Penela, recoñecida pola súa contribución á gastronomía betanceira; e Maruja Barral, con comercio de xoiería na rúa dos Plateiros.
Tamén se propón homenaxear a Sara Viqueira (A Riaña), nai de familia numerosa recoñecida polo seu labor incansable; a Hildegart Rodríguez Carballeira, unha nena prodixio con gran impacto no ámbito científico e divulgador; a Olimpia Turné e Rosina Martínez, pintoras e docentes de arte; e a Isabel de Lucerna, peregrina que faleceu en Betanzos en 1739 durante o Camiño de Santiago.
Entre as personalidades recoñecidas figuran ademais Maruxa Pita Lisarrague, misioneira e fundadora dunha escola en Filipinas para nenos desfavorecidos; María Teresa Sobrino, emprendedora e colaboradora de diversas entidades sociais; Esther Vázquez, vinculada a iniciativas culturais e sociais en prol da muller; e Berta Cortés Rey, comerciante que, tras emigrar a Londres, impulsou a modernización do comercio local.
A proposta inclúe tamén institucións relixiosas e sociais como a Fundación Hospitalarias de Betanzos, as Hermanitas de los Ancianos Desamparados, a Fundación Raiola e a Asociación Mirabal, que traballa na protección das vítimas de violencia de xénero e a defensa da infancia. Dende o PP de Betanzos esperan que esta proposta sexa avaliada positivamente e poida materializarse como un recoñecemento ao legado destas mulleres que contribuíron ao desenvolvemento da vila en distintos ámbitos.