O PP de Betanzos insta ao Concello a rectificar a súa decisión de pechar o casco histórico á mobilidade de vehículos
O Partido Popular insta ao equipo de goberno a desistir da súa decisión de limitar a 15 minutos a circulación de vehículos. Neste sentido, Cecilia Vázquez indicou que a medida impulsada desde o Concello “prexudica os residentes, os negocios e á propia supervivencia da área monumental”. Para a voceira popular, “trátase dunha limitación radical á mobilidade na zona que é froito da improvisación e foi tomada sen ter en conta os residentes, comerciantes, hostaleiros e profesionais con actividade económica na zona”.
Vázquez indicou que o Partido Popular leva anos insistindo nunha proposta para o casco histórico que se fundamenta en considerar esta área urbana como o que realmente é: un conxunto e, en consecuencia, as actuacións teñen que deseñarse para a súa totalidade. Para emprender ese camiño cara á revitalización do conxunto, é necesario actualizar un Plan Especial de Protección e Ordenación do Casco Histórico (PEPOCH). Continuar co Plan Rexurbe —rehabilitación de vivendas para alugueiro social— e potenciar a área Rexurbe. - Plan de dinamización do casco.
Xunto con estas actuacións é imprescindible crear zonas de estacionamento de vehículos. Incentivar a apertura de servizos básicos na área, establecementos de alimentación, actividade profesional, espazos para o asentamento de mozos emprendedores. En definitiva, recuperar o tecido económico, social e cultural deste espazo singular. “Algo que se pode conseguir impulsando proxectos integradores abertos ao progreso e á liberdade, e non accións illadas, que rompen o tecido social e son limitadoras, que o único que conseguen é o despoboamento da zona e a súa decadencia”, comentou Cecilia Vázquez.
“Un casco sen persoas, sen vida, sen actividade económica é un casco condenado. A extrema limitación de tempo para o desprazamento de vehículos condena aos seus veciños e aos negocios”. Ao xuízo da voceira popular, “o goberno local está facendo todo o contrario ao que se debería facer e, por se isto fose pouco, de costas á cidadanía”.
É un goberno local que gasta o que non ten e sen sentido. En menos de dous meses 590.000 euros nun mobiliario urbano para a zona que non convence a ninguén e que non era necesario. Tras unha obra de 1,5 millóns de euros, vemos como a concesión do mercado municipal non interesa a ningunha empresa. Todo isto unido á lentitude na concesión de licenzas de obra, ao abandono do mantemento, ás rúas cheas de verdello e sucias, indica Vázquez. “Ben é certo que nesta espiral de destrución conta co servil apoio dos concelleiros do BNG”.
Para a voceira popular é imprescindible que o PSOE rectifique e non leve a cabo a súa última ocorrencia ou as consecuencias serán devastadoras, en primeiro lugar para os residentes na zona histórica e despois para a totalidade da cidade e do municipio. En palabras de Cecilia Vázquez, “o PSOE de Betanzos converteuse nunha arma de destrución masiva para todos”.