O PP de Betanzos denuncia verteduras recorrentes de restos vexetais xunto á pista deportiva de Tiobre
O Grupo Municipal do Partido Popular de Betanzos fixo público hoxe o malestar de numerosos veciños da parroquia de San Martiño de Tiobre pola situación de abandono que, segundo denuncian, se rexistra no entorno da pista deportiva situada en terreos de titularidade municipal.
A voceira popular, Ceci Vázquez, lembra que xa hai meses advertira da falta de limpeza e do estado de deixadez destes terreos do Concello e subliña que, lonxe de corrixirse, 'a situación empeorou notablemente polo acopio de maleza e restos vexetais para que se podrezan alí'.
Vázquez afirma que a preocupación é aínda maior pola aparición de palmeiras infectadas depositadas na zona. 'As palmeiras afectadas deberían eliminarse conforme marca a normativa, e non deixarse ao aire libre, nun espazo público, para que se vaian descompoñendo', sinala a concelleira.
Ante este escenario, o PP reclama ao goberno local que investigue quen está a realizar estes vertidos e sancione a persoa ou empresa responsable, 'para que quede claro que estas condutas incívicas non van quedar impunes'. Ao mesmo tempo, insta o executivo que preside María Barral a retirar canto antes a maleza acumulada e xestionar a súa eliminación de acordo cos procedementos ambientais establecidos.