O PP de Betanzos critica que o goberno substitúa o proxecto do pump track por unha pista de pádel
O Partido Popular de Betanzos expresou a súa preocupación tras a aprobación, no pleno extraordinario celebrado onte, de destinar os fondos do programa POS+ Adicional da Deputación da Coruña á construción dunha nova pista de pádel na contorna do Carregal, cun investimento de 157.256,85 euros.
Segundo os populares, esta decisión deixa de lado o proxecto do pump track, elixido pola veciñanza na convocatoria de orzamentos participativos de 2022 e demandado polos clubes ciclistas e a comunidade de skaters.
A voceira do Grupo Municipal do PP, Ceci Vázquez, explicou que o seu voto en contra ao POS+ Adicional buscou respectar a vontade da veciñanza e manter a coherencia cos compromisos políticos. Vázquez destacou que o PP non se opón á construción dunha nova pista de pádel, pero considerou que resulta contradictorio non ter en conta a opción maioritaria da cidadanía durante tres anos.
A portavoz popular tamén lembrou que no ano 2021 o goberno local comprometeuse coa construción dunha pista de skate, compromiso que aínda non se materializou.
No pleno de onte, o BNG absteuse na votación, mentres que os dous edís non adscritos apoiaron o proxecto da pista de pádel. Ao remate da sesión, representantes dos clubes ciclistas expresaron as súas queixas pola prioridade outorgada á nova infraestrutura.
A proposta actual permitirá a creación dunha nova pista de pádel no Carregal, mentres que a comunidade segue a demandar a materialización do pump track, un proxecto solicitado polos usuarios do ciclismo e do skate.