O PP de Betanzos acusa ao Goberno local de maquillar a débeda municipal
O Partido Popular de Betanzos, a través da súa portavoz, Cecilia Vázquez, esixiulle ao goberno municipal un discurso realista e veraz sobre a situación da débeda municipal. Segundo indicou Vázquez, mentres o grupo socialista insiste en que o PP desinforma sobre a realidade contable do concello, “a Intervención municipal contradí esta versión edulcorada da nefasta xestión dos responsables políticos do Concello de Betanzos”.
A popular referiuse ao informe da Intervención municipal, que sinala que "o capital vivo pendente de amortizar a 31 de decembro de 2024 polos préstamos concertados ou vixentes ascende a 6.424.742,80 euros". O documento tamén recolle que o Concello de Betanzos “foi incluído no procedemento para financiar a cancelación de obrigas pendentes de pago a provedores”, unha situación que, segundo os populares, desminte as afirmacións do portavoz socialista, quen aseguraba que “as facturas sen pagar contábanse cos dedos dunha man”.
Vázquez denunciou que a Intervención municipal desmonta o relato do goberno local, “un relato baseado na irresponsable intención de enganar aos veciños”. O informe recolle literalmente que a grave situación das contas municipais supón que “o Concello de Betanzos non poderá concertar operacións de crédito sen previa autorización”. Ademais, establece que, cando o aforro neto sexa negativo, o Pleno deberá aprobar un plan de saneamento financeiro nun prazo máximo de tres anos.
Neste sentido, a portavoz do PP advertiu de que, dentro deste período, deberán adoptarse “medidas de xestión tributaria, financeira e orzamentaria que permitan axustar a cero o aforro negativo da entidade”. Ademais, recórdase que o Concello de Betanzos precisará da autorización da Xunta de Galicia para concertar calquera nova operación de crédito ao estar incluído no Procedemento de Pago a Provedores.
Para Vázquez, os datos do informe deixan en evidencia a falta de xestión profesional das contas públicas por parte do equipo de goberno municipal. “O discurso do equipo de goberno está máis preto da fantasía que da realidade. Unha realidade que o PP leva anos trasladando aos veciños”, afirmou. Por último, preguntouse se desde as filas socialistas tamén van considerar este informe da Intervención municipal como un bulo.