O PP de A Coruña esixe convocar con urxencia a comisión do Mundial antes da visita da FIFA
O Grupo Popular da Coruña reclamou á alcaldesa, Inés Rey, que convoque con urxencia a comisión especial do Mundial 2030 e dea acceso á oposición a toda a documentación relacionada coa candidatura da cidade. O portavoz municipal do PP, Miguel Lorenzo, asegura que o seu grupo rexistrou esta semana un escrito no Concello no que solicita, ademais, que todos os grupos municipais poidan asistir á visita dos representantes da FIFA prevista para o 18 de marzo, ao considerar que se trata dun asunto 'estratéxico' e dun 'tema de cidade'.
Lorenzo lamenta que, a cinco días desa visita, o seu grupo siga sen recibir resposta. O portavoz critica a falta de información sobre as xestións realizadas polo Goberno local e sostén que a cidadanía demanda transparencia arredor dun proxecto que, ao seu xuízo, continúa sen avances visibles en financiamento, planificación e execución. Estas afirmacións forman parte da ofensiva política do PP para que o executivo local explique en que punto se atopa realmente a carreira de Riazor para manterse como sede do Mundial.
A petición dos populares chega nun momento de máxima incerteza sobre o futuro da candidatura coruñesa. Nos últimos días, a alcaldesa evitou concretar o contido da reunión mantida co presidente do Deportivo, Juan Carlos Escotet, mentres distintas informacións apuntan ás dificultades para sacar adiante o proxecto nos termos previstos inicialmente. O Concello considera inviable afrontar o plan sen a colaboración do club e xa se estaría explorando unha reforma máis limitada de Riazor, á marxe do Mundial.
Nese contexto, o PP insiste en que o Goberno local debe explicar tanto o resultado das reunións mantidas en Madrid como o alcance real das negociacións abertas arredor da candidatura. Lorenzo enmarca esta reclamación na relevancia pública do proxecto e lembra que o Mundial foi presentado por Inés Rey como un dos eixos do mandato.