O PP da Coruña presenta alegacións á ordenanza das vivendas turísticas
O portavoz do Grupo Popular no Concello da Coruña, Miguel Lorenzo, anunciou que o seu grupo presentará alegacións á ordenanza reguladora das vivendas de uso turístico, aprobada inicialmente no Pleno de febreiro cos votos a favor do PSOE e do BNG e coa abstención do PP. Segundo Lorenzo, esta non é a maneira axeitada de regular estas vivendas e considera que o Goberno municipal está a cometer un erro de forma que pode invalidar a normativa.
O PP reclama que, antes de aprobar a ordenanza, se modifique o planeamento urbanístico para incorporar un novo uso específico, o terciario de vivendas de uso turístico, que actualmente non existe. Só despois desta modificación debería regularse mediante unha ordenanza, xa que, segundo o grupo popular, unha norma deste tipo non pode establecer novos usos urbanísticos, algo que é competencia exclusiva do planeamento. A Asesoría Xurídica do Concello xa recomendou que primeiro se realice unha modificación puntual das Normas Urbanísticas do PGOM e do PEPRI para outorgar maior seguridade xurídica a esta actividade. Con todo, o Goberno municipal decidiu encadrar as vivendas turísticas dentro do uso terciario hoteleiro en lugar de crear unha nova categoría específica, decisión que os populares consideran errónea.
Outro dos puntos que critica o PP é a aplicación retroactiva da normativa. A ordenanza permite que o Concello suspenda a actividade das vivendas turísticas xa rexistradas na Xunta de Galicia e ordene o seu peche en caso de incompatibilidade. Os populares consideran que isto xera unha gran inseguridade xurídica para aqueles propietarios que cumpriron coa normativa autonómica e inscribiron legalmente as súas vivendas de uso turístico, baseándose no Decreto 12/2017 do 26 de xaneiro. Segundo explican, ata o de agora, a única limitación para exercer esta actividade na Coruña era que non estivese prohibida pola normativa urbanística ou polos estatutos da comunidade de propietarios. O PP denuncia que moitos propietarios fixeron investimentos e esforzos económicos para acondicionar as súas vivendas de acordo coa lexislación vixente, polo que consideran desproporcionada a aplicación retroactiva da nova ordenanza.
Os populares urxen ao Goberno municipal a reconsiderar a normativa e a seguir os pasos legais correctos para evitar posibles impugnacións e incertezas para os propietarios de vivendas turísticas na Coruña.