O PP da Coruña denuncia os retrasos nas melloras pendentes en Monte Alto
O portavoz do Grupo Popular no Concello da Coruña, Miguel Lorenzo, acompañado dos edís Carlos San Claudio e Carmen No, visitou o barrio de Monte Alto, onde constatou a falta de investimentos e os continuos retrasos nas melloras anunciadas polo Goberno municipal. Durante a súa visita, Lorenzo anunciou que o PP presentará varias iniciativas no próximo Pleno para esixir a execución das actuacións pendentes na zona.
Un dos principais problemas que sinalaron os populares é a paralización do proxecto do Parque do Vixía, unha das promesas do Goberno local presentada en 2020. A obra, que estaba pensada para crear unha zona verde de 16.000 metros cadrados na zona máis elevada de Monte Alto, leva sen avances desde aquel entón. Segundo o Goberno municipal, a creación deste parque depende de cambios urbanísticos para que os terreos, que están clasificados como equipamento, pasen a ser considerados espazo libre. A pesar de que este proceso foi anunciado no Pleno de xullo de 2024, non se rexistraron novidades nin avances nos últimos meses.
A este atraso súmanse outras iniciativas pendentes, segundo indican. como a reforma do mercado de Monte Alto, que debería ter rematado en febreiro de 2025, pero que, segundo os populares, non se completará ata principios do próximo ano. Lorenzo tamén destacou o retraso na cesión do edificio da antiga prisión provincial, do cal non hai avances na súa reutilización, a pesar de que a xustiza deu a razón ao PP en relación á devolución sen custo.
O portavoz do PP denunciou que a falta de acción do Goberno local non se limita só a Monte Alto, senón que se enmarca dentro dunha xestión global de non execución de investimentos. "No orzamento de 2024 había unha partida de 1,2 millóns de euros para o Parque do Vixía, pero pasados cinco anos, o Goberno municipal non moveu nin un papel para facer realidade esta promesa", afirmou Lorenzo. "A situación é aínda máis alarmante cando vemos que Lage Tuñas e Inés Rey deixaron sen gastar 80 millóns de euros para investimentos en 2024, tres de cada catro euros orzamentados", subliñou.
O Grupo Popular tamén manifestou a súa preocupación pola crecente sensación de inseguridade no barrio, derivada dos roubos e o tráfico de drogas. Para os populares, é imprescindible que o Concello tome medidas para mellorar a seguridade e poña fin á falta de mantemento nas rúas de Monte Alto.
A visita a Monte Alto forma parte dunha serie de actuacións que o PP está levando a cabo para fiscalizar a xestión do Goberno local e esixir que as promesas feitas se fagan realidade para mellorar as condicións de vida dos veciños e veciñas de todos os barrios da cidade.