O PP carga contra Barral e garante que 'a Xunta cumprirá con Betanzos'
A voceira do Grupo Municipal do Partido Popular en Betanzos, Ceci Vázquez, saíu ao paso das valoracións da alcaldesa sobre o proxecto de orzamentos da Xunta para 2026 asegurando que 'o Goberno galego volverá cumprir con Betanzos, como fixo ata agora, malia que María Barral non fixo os deberes en tempo e forma'.
Vázquez sostén que a rexedora 'é a menos indicada para xulgar e dar leccións sobre orzamentos' porque 'non levou a aprobación as contas municipais deste exercicio nin fixo público que pensa facer coas de 2026'. A popular lembrou que o seu grupo presentou unha moción cun paquete de 16 achegas para incorporar ás contas do vindeiro ano.
Segundo a portavoz, 'a prioridade da alcaldesa non foi pechar investimentos para Betanzos reuníndose cos distintos conselleiros cando tocaba, senón buscar a confrontación coa Xunta'. Nesa liña, anunciou que nos próximos días fará unha 'avaliación pormenorizada' das inversións previstas polas diferentes consellerías no municipio para 2026.
Vázquez lamentou que en Betanzos 'haxa unha alcaldesa cuxa estratexia non pase por manter unha relación construtiva e produtiva cos distintos conselleiros e conselleiras, senón por criticar permanentemente ao Goberno autonómico e anunciar emendas aos orzamentos'. E concluíu que 'este goberno socialista segue demostrando a súa inoperancia, porque nin sabe administrar os recursos municipais, deixando o Concello endebedado, nin sabe pedir e xestionar co resto das administracións'.