O POS+2026 achega case 20 millóns de euros aos concellos da comarca da Coruña
A Deputación da Coruña aprobou por unanimidade no pleno de hoxe as bases do Plan Único (POS+2026), que arrinca cun orzamento inicial de 88 millóns de euros e que a institución provincial reivindica como o principal motor de investimento para os 93 concellos coruñeses. Pecha así 2025 cun balance récord de 138 millóns de euros mobilizados a través do POS+.
O presidente da Deputación, Valentín González Formoso, salientou que o modelo do Plan Único, que os alcaldes e alcaldesas cualifican de imprescindible, garante que todos os municipios conten con recursos para obras, servizos públicos e políticas sociais. A aprobación das bases un mes antes de rematar o ano permitirá que os concellos teñan marxe para programar os seus investimentos desde o 1 de xaneiro de 2026.
Na comarca da Coruña, os concellos de referencia reciben en conxunto 19.796.314,22 euros. As asignacións son as seguintes:
- Abegondo: 982.199,98 euros
- Aranga: 766.910,96 euros
- Arteixo: 2.179.029,12 euros
- A Coruña: 371.678,13 euros
- Bergondo: 729.724,06 euros
- Betanzos: 888.533,04 euros
- Cambre: 1.524.430,96 euros
- Carral: 729.599,01 euros
- Coirós: 438.512,99 euros
- Culleredo: 1.861.687,17 euros
- Curtis: 836.492,35 euros
- Irixoa: 550.977,55 euros
- Miño: 705.539,73 euros
- Oleiros: 2.078.321,50 euros
- Oza-Cesuras: 1.380.970,30 euros
- Paderne: 519.089,47 euros
- Sada: 1.092.202,19 euros
- Vilasantar: 509.748,82 euros
Formoso subliñou que o Plan Único é xa unha marca propia da Deputación, baseada na confianza nos concellos e na defensa da autonomía local. Lembrou que, ao seren os gobernos municipais quen deciden libremente as súas prioridades, o POS permitiu ao longo da última década modernizar servizos públicos, mellorar infraestruturas básicas e impulsar proxectos estratéxicos en todo o territorio provincial.
O POS+2026 permitirá seguir avanzando en melloras de vías municipais, redes de abastecemento e saneamento de auga, iluminación eficiente, renovación de espazos urbanos e rurais e modernización de equipamentos culturais, deportivos e sociais nestes concellos. Unha parte relevante dos fondos destinarase tamén a programas sociais municipais, clave para a atención ás persoas maiores, á infancia, ás familias con menos recursos e aos colectivos máis vulnerables.
Nese sentido, o presidente lembrou que o POS Social, a liña específica destinada a financiar políticas sociais, increméntase nun 14% en 2026, pasando de 7 a 8 millóns de euros, o que permitirá reforzar servizos e programas de proximidade nos concellos da comarca da Coruña.
Desde a súa posta en marcha hai dez anos, o Plan Único mobilizou 812 millóns de euros e financiou 4.643 obras nos 93 concellos da provincia, converténdose na columna vertebral da cooperación local da Deputación.
Ademais, o pleno aprobou outros asuntos, entre eles un convenio con Aspronaga para financiar con 200.000 euros a reforma interior da residencia Ricardo Baró, en Oleiros, co obxectivo de mellorar o confort, a accesibilidade e a iluminación dun centro que data de 1985 e no que residen 71 persoas.