O pleno de Culleredo aproba unha declaración institucional para mellorar a rotonda de Ledoño
O pleno do Concello de Culleredo aprobou unha declaración institucional, acordada coa Plataforma de Afectados de Ledoño, na que se insta á Xunta de Galicia a anular a esixencia de suprimir a glorieta situada na intersección da AC-523 coa estrada de Rumbo, unha infraestrutura clave no plan de accesos ao novo colexio que se está a construír na zona.
Desde o Concello deféndese que a rotonda é esencial para garantir a fluidez e seguridade do tráfico, especialmente nun contexto de incremento de mobilidade polos desprazamentos escolares. Por iso, a declaración tamén solicita á Xunta e á Deputación da Coruña que acometan melloras e ampliacións na glorieta, co obxectivo de adaptala ás novas necesidades de circulación.
A iniciativa institucional inclúe ademais unha reclamación á administración autonómica para que adopte medidas de seguridade viaria na estrada AC-523, especialmente en relación co paso de peóns, un aspecto que preocupa tanto ao goberno local como á veciñanza.
Con este acordo, o Concello de Culleredo reflicte o apoio á veciñanza de Ledoño e aposta por unha solución dialogada que permita compatibilizar os novos equipamentos educativos co mantemento e mellora das infraestruturas viarias existentes.