O pleno de Carral crea unha comisión para revisar os límites do municipio e aproba un plan de vivenda
O Concello de Carral celebrou un pleno no que se deu luz verde, por unanimidade, á designación das persoas que integrarán a comisión de demarcación e deslinde do municipio, o órgano encargado de supervisar e actualizar os límites do termo municipal e atender posibles incidencias nos lindeiros con concellos veciños.
Durante a mesma sesión plenaria tomou posesión como nova concelleira do PP de Carral Patricia López Ferreiro, que se incorpora á corporación local para completar o grupo municipal popular.
O pleno abordou tamén a política de vivenda no municipio. A corporación aprobou unha moción presentada polo PSOE de Carral na que se reclama impulsar a rehabilitación e o alugueiro de vivendas tanto nas parroquias como nos núcleos urbanos, co obxectivo de aumentar a oferta residencial e frear a perda de poboación no rural.
Entre as actuacións recollidas na iniciativa figura a elaboración dun inventario de vivendas baleiras existentes no concello, un paso previo para poder poñelas en uso, prioritariamente a través do alugueiro, e favorecer así o acceso a unha vivenda a prezos asumibles para a veciñanza.