O piloto arteixán Roberto Blach Jr. da o salto á WRC2
Tras algo máis dunha tempada competindo no FIA Junior WRC, no que Roberto Blach Jr. conseguiu subir repetidas veces ao podio, ao novo piloto arteixán chegoulle a oportunidade de dar o salto ao WRC2 grazas á súa fichaxe polo equipo The Racing Factory, coordinado por Aloísio Monteiro.
Tras competir o pasado mes de maio no Rallye Illas Canarias a bordo do Skoda Fabia RS Rally2, a dupla de Arteixo seguirá coa súa adaptación á súa nova montura esta fin de semana, no Rallye Castelo Branco antes de competir en setembro no Rallye Acrópole e en outubro no Central European Rally, onde pelexará encadrado na categoría WRC2, a previa á máxima categoría do certame mundialista.
A cita do centro de Portugal celebrarase dividida en dúas etapas, cun total de once especiais que completarán algo máis dun centenar de quilómetros cronometrados e onde Roberto Blach Jr. medirase aos mellores equipos do país veciño, onde participan varios pilotos que competiron no mundial de rallies.
Roberto Blach Jr. amosabao seu entusiasmo fronte esta oportunidade: “The Racing Factory ofreceunos unha proposta que non podiamos rexeitar, e grazas a iso daremos o salto ao WRC2. Esta tempada imos competir noutras dúas probas do FIA World Rallye Championship co obxectivo de coñecer as carreiras e adaptarnos ao Skoda Fabia RS Rally2, co que esperamos competir a próxima tempada dentro da segunda categoría do mundial. O apoio de Aloísio Monteiro e dos nosos patrocinadores fixo posible que podamos seguir progresando na nosa traxectoria deportiva. The Racing Factory é un equipo de primeiro nivel, como demostran todos os títulos tanto nacionais como internacionais que lograron como equipo acompañando a grandes pilotos".
Ao que engadía: "Esta fin de semana disputarase o Rallye Castelo Branco, onde xa competimos na tempada 2018, cando logamos o título na Peugeot Rally Cup Ibérica, é unha proba da que temos un bo recordo porque foi onde nos colocamos no liderado do certame promocional que acabamos gañando a final de tempada, sobre todo pola traxectoria que fomos percorrendo desde aquel momento. O noso obxectivo é seguir coñecendo o Skoda Fabia RS Rally2 e ver se podemos pelexar de ti a ti contra os equipos locais, que teñen un nivel extraordinario.”