O paseo entre o Aquarium e a Torre renovará o firme con cortes de tráfico desde o 6 de abril
O tramo do Paseo Marítimo comprendido entre a rotonda do Aquarium Finisterre e a da Torre de Hércules será obxecto de traballos de reparación e mellora do pavimento entre os días 6 e 13 de abril, unha actuación que levará aparellados cortes e restricións de tráfico en distintos momentos da semana.
A primeira fase executarase o luns 6 e o martes 7 de abril, entre as 9.30 e as 19.30 horas, co asfaltado do carril pegado ao mar no percorrido entre o Aquarium e a Torre. A continuación, o mércores 8 de abril, tamén no mesmo horario, os traballos centraranse no último tramo da rotonda da Torre de Hércules.
A actuación continuará os días 9, 10, 11 e 13 de abril, novamente entre as 9.30 e as 19.30 horas, coa pavimentación do carril interior do Paseo Marítimo entre ambas as dúas rotondas. Durante todo o desenvolvemento das obras, o tráfico en sentido desde a Torre cara ao Aquarium permanecerá cortado, polo que os vehículos deberán empregar como itinerario alternativo a rolda de Monte Alto.
No sentido contrario, desde o Aquarium cara á Torre, a circulación manterase aberta, primeiro polo carril interior e despois polo carril máis próximo ao mar, en función do avance das distintas fases da obra. Ademais, os días 8 e 13 de abril establecerase un desvío á altura da rúa Veramar para acceder á rolda de Monte Alto, xa que a rotonda da Torre quedará completamente pechada e non se poderá entrar desde a avenida de Navarra.
Nesas dúas xornadas, só os autobuses urbanos poderán continuar ata a altura da rúa Hermanos de la Lejía. Para informar aos condutores, colocaranse sinais provisionais na contorna da rotonda de Veramar e do propio Paseo Marítimo.