O parque de Eirís celebra este fin de semana o Día da Familia con actividades para todas as idades
Este fin de semana, o parque de Eirís acollerá unha gran festa con motivo do Día da Familia, grazas á colaboración entre o Concello da Coruña e a Asociación de Comerciantes do Castrillón, Eirís e Monelos (Acocem). O evento, que terá lugar o sábado 7 e o domingo 8 de setembro, ofrecerá unha ampla gama de actividades lúdicas e festivas para todas as idades, reflectindo o compromiso do Goberno de Inés Rey coa dinamización dos barrios e a promoción de eventos de proximidade.
A celebración comezará o sábado ás 11.00 horas e prolongarase ata as 21.00 horas do domingo, cun programa variado que incluirá música, teatro, deporte, obradoiros e coloquios. Durante toda a xornada, os asistentes poderán gozar dunha feira de comercio, artesanía e hostalería, así como de obradoiros infantís e xuvenís e atraccións abertas ao longo do día.
O sábado inclúe un torneo de fútbol infantil organizado pola SD Eirís, que dará comezo ás 11.00 horas, xunto coa actuación do grupo Musicoterapia. Ás 12.00 horas, os pequenos poderán disfrutar dunha sesión de teatro de Kids&Us e, ás 13.00 horas, a música tradicional chegará da man de A Trova Coruñesa.
Á tarde, a partir das 15.00 horas, ADC Alquimia Inline ofrecerá unha proba de patíns en liña, un concurso de tiros a porta de hóckey e unha exhibición de freestyle. A programación tamén inclúe unha charla de InDiCan (Iniciativa Dignidade Canina) e unha coreografía de Artestudio ás 16.30 horas. Ás 17.00 horas, María García realizará a sinatura de libros da súa obra ‘El renacer de los girasoles’, que tamén estará dispoñible para a firma o domingo ás 13.00 horas. Tamén actuarán a Casa de Aragón e o actor César Cambeiro fará o pregón ás 18.00 horas. A xornada do sábado concluirá cunha batalla de galos ás 19.00 horas, a actuación musical de O Tren da Unha ás 22.00 horas e DJ Pukas a partir da 01.00 da mañá.
O domingo comezará coa celebración dunha carreira infantil ás 10.00 horas, seguida dun torneo de fútbol xuvenil ás 12.00 horas e unha actuación musical de Begoña García ás 13.30 horas. Ás 17.00 horas, terá lugar o torneo de fútbol feminino e, ás 19.00 horas, o de categoría masculina da SD Eirís. Ademais, ás 17.30 horas, realizarase un desfile de moda e peiteado, e a xornada finalizará cunha festiva festa Holi ás 19.00 horas.
O Día da Familia en Eirís promete ser un evento inclusivo e divertido, que permitirá á cidadanía gozar dunha variada oferta de actividades e disfrutar dun ambiente festivo na contorna do parque.
