O Outono Cultural regresa a Senra cunha sesión de cine familiar coa proxección de ‘Wonka’
O programa do Outono Cultural volve este sábado a Senra cunha proposta pensada para gozar en familia: a proxección de ‘Wonka’, unha película que funciona como precuela do mítico personaxe de Willy Wonka, coñecido polo seu universo de chocolate e fantasía.
A sesión será o 20 de decembro, ás 19.00 horas, e achega á pantalla a historia dun Wonka novo, cando aínda era un mozo cheo de ideas e ilusións que soña con abrir unha tenda propia e converterse no mellor inventor de doces. No camiño atopará obstáculos, rivais e normas que lle complican o paso, pero tamén amizades e apoios inesperados, nun relato no que se mesturan aventura, humor e números musicais.
A actividade enmárcase na programación cultural local e conta co apoio da Rede Cultural do departamento de Cultura da Deputación da Coruña, coa intención de achegar propostas audiovisuais actuais aos distintos núcleos e fomentar o ocio compartido nestas datas.