O neurocirurxián Manuel García Fantini, Premio Cantábrico Excelente 2025 en Cirurxía
O neurocirurxián Manuel García Fantini, colexiado no Colexio Oficial de Médicos da Provincia da Coruña, será distinguido co Premio Cantábrico Excelente na categoría de cirurxía nun acto que terá lugar no Pazo de Vilaboa. O galardón, que alcanza a súa duodécima edición, pon o foco na traxectoria do especialista, na humanidade coas persoas ás que atende e na súa vocación exemplar.
O facultativo confesou sentirse especialmente agradecido por esta distinción. “Para min foi unha sorpresa, non o agardaba. É o primeiro recoñecemento que recibo e supón un orgullo tanto a nivel profesional coma persoal”, sinala. Engade que lle produce unha emoción especial pola súa familia e, en particular, polos seus fillos: “é moi bonito que vexan que ao seu pai o premian tamén fóra do quirófano”.
García Fantini pasa consulta no instituto de neurocirurxía que leva o seu nome e opera no hospital HM Modelo de A Coruña. Está especializado en cirurxía complexa de columna e conta cunha alta valoración por parte das persoas pacientes, ás que di dedicarse por completo. “Nacín para o que fago. Se tivese que comezar de novo, volvería ser neurocirurxián”, afirma.
Para o premiado, a excelencia na medicina non se limita á destreza técnica. Considera que con ela “só se acada eficacia, pero se queres curar de verdade a un enfermo tes que poñerte no seu lugar” e aplicar os coñecementos “con vocación e sentimento”. Un modo de entender a profesión que asegura ter interiorizado desde neno, influenciado polo exemplo do seu pai, xinecólogo. Neste punto contrasta co que percibe nas novas xeracións: “hoxe en día, os novos profesionais rematan a especialidade cun coñecemento moi técnico e son eficaces, pero exercen con pouca humanidade”, lamenta.
O médico recorda que quen acode á consulta non leva só un diagnóstico de tumor ou hernia discal. “O que trae o paciente é dor e limitación, que lle condicionan a vida persoal e laboral e tamén ao seu círculo familiar. Se non o podes curar, tes que aliviar e, se tampouco podes aliviar, polo menos debes acompañar”, resume.
García Fantini destaca ademais o peso do diagnóstico en neurocirurxía para poder iniciar un tratamento axeitado. Grazas ás novas resonancias nas que se incorpora a intelixencia artificial, considera que “hoxe temos practicamente todo nas nosas mans”. No ámbito do quirófano, subliña o avance dos “sofisticados sistemas de navegación vertebral ou cerebral e das técnicas microcirúrxicas coas que traballamos, que permiten reducir ao mínimo os erros”.