O Museo do Xacemento Romano de Cambre abre a exposición 'Fauna esencial', con 28 imaxes de gran formato sobre biodiversidade
O Museo do Xacemento Romano de Cambre suma unha nova proposta á súa programación coa chegada de 'Fauna esencial', unha exposición fotográfica que convida a mirar de preto a vida salvaxe do noso contorno e a reflexionar sobre a importancia de conservar os ecosistemas. A mostra, composta por 28 fotografías de gran formato do naturalista e fotógrafo de natureza Ezequiel Martínez, propón un percorrido visual por distintas especies (desde mamíferos a aves) acompañado de contidos divulgativos para contextualizar o seu valor ecolóxico e a necesidade de protexer a biodiversidade.
A inauguración está prevista para o martes 23 ás 9.30 h e a exposición permanecerá aberta ao público do 22 de decembro ao 25 de xaneiro. Poderá visitarse de martes a venres en horario de 11.00 a 14.00 e de 17.00 a 20.00 h, mentres que os sábados e domingos o horario será de 11.00 a 14.00 h (os luns, pechado).
O escenario da mostra é o Museo do Xacemento Romano, situado na Praza do Mosteiro, un espazo municipal vencellado á interpretación do patrimonio arqueolóxico de Cambre e tamén ao Camiño Inglés, ao estar integrado na súa contorna cultural e patrimonial. A visita é gratuíta, o que facilita achegarse tanto en familia como en grupo a unha proposta que combina cultura, divulgación e sensibilización ambiental.