Infraestructuras

O Concello e a Xunta supervisaron a rehabilitación deste elemento situado na Reserva da Biosfera Mariñas Coruñesas, unha actuación apoiada con 30.000 euros para mellorar a súa conservación e poñelo en valor

O Muíño de Sisalde dá un novo paso na súa recuperación tras a intervención impulsada para conservar e poñer en valor un dos elementos máis recoñecibles do patrimonio etnográfico de Arteixo. O alcalde, Carlos Calvelo, participou nunha visita institucional xunto á delegada da Xunta na Coruña, Belén do Campo, e á directora territorial de Medio Ambiente, Pilar Arias, para comprobar o resultado das obras.

Os traballos permitiron actuar sobre aspectos clave da estrutura, coa renovación da cuberta con materiais semellantes aos orixinais, a rehabilitación das paredes de madeira, a súa impermeabilización e un tratamento integral da madeira. A intervención incluíu tamén a reposición do canal de pedra, un elemento fundamental no funcionamento tradicional do muíño.

A actuación contou cunha achega de 30.000 euros da Xunta e inscríbese na liña de axudas para estudos e investimentos vinculados á conservación, recuperación e rehabilitación do patrimonio natural e cultural nas reservas da biosfera de Galicia. No caso de Arteixo, o proxecto encaixa ademais no valor ambiental e simbólico dun enclave integrado na Reserva da Biosfera Mariñas Coruñesas.

Con esta mellora, o municipio reforza a protección dun espazo ligado á súa identidade histórica e á memoria do territorio, ao tempo que gaña un recurso máis para divulgar o seu legado cultural e paisaxístico.