O MUDITEL reforza o seu papel como ‘museo vivo’ das telecomunicacións tras a visita institucional da Deputación
O Museo Didáctico das Telecomunicacións (MUDITEL) recibiu a visita dunha representación da Deputación da Coruña, encabezada polo vicepresidente provincial, Xosé Regueira, e pola deputada de Cultura, Natividade González, xunto coa deputada e voceira do BNG, Avia Veira. A comitiva coñeceu de primeira man o traballo de conservación e divulgación do patrimonio tecnolóxico que desenvolve a entidade, que nos últimos anos vén mellorando e modernizando instalacións e recursos expositivos co apoio das liñas de subvencións provinciais.
Durante o percorrido polas salas, guiados polo presidente do museo, Félix Rodríguez Fernández, e polo membro fundador Ernesto López Naveiras, os representantes provinciais afondaron no funcionamento do espazo e no labor de recuperación e posta en valor da evolución das telecomunicacións. Un dos elementos que singularizan o MUDITEL é que conserva e amosa equipamentos históricos plenamente operativos, permitindo reproducir o traballo real das antigas instalacións telefónicas e explicar, con exemplos en directo, como se conectaba o mundo antes da era dixital.
Regueira sinalou que a aposta da Deputación pola cultura e pola divulgación científica é estratéxica e que proxectos como o MUDITEL demostran como a memoria tecnolóxica pode converterse nun recurso pedagóxico e turístico de primeiro nivel. Pola súa banda, González puxo o foco na adecuación das instalacións como vía para atraer novos públicos, mellorar a experiencia das visitas e fortalecer a capacidade educativa dun museo que, segundo subliñou, ‘democratiza’ o acceso á historia das telecomunicacións.
Veira, pola súa parte, resaltou o valor social da iniciativa, nacida do impulso dun grupo de xubilados de Telefónica que decidiu salvar do despezamento pezas clave da historia industrial e restauralas para crear unha colección singular, xestionada por unha asociación sen ánimo de lucro. Aberto desde o ano 2000, o museo recibe con frecuencia visitas de centros educativos e colectivos profesionais, ademais de público xeral interesado na tecnoloxía e na historia recente.
A entidade ofrece visitas guiadas gratuítas, con cita previa, e un percorrido que vai desde as centrais manuais das ‘telefonistas’ ata sistemas máis modernos, coa particularidade de que unha boa parte das pezas continúan a funcionar. O museo está situado na central telefónica da Coruña (Montiño), con acceso pola rúa Antonio Ríos, e informa dun horario de luns a venres de 9.00 a 18.00 horas.