O Mercado Gandeiro de Curtis do 23 de novembro manterase sen gando bovino pola alerta sanitaria
O Concello de Curtis vén de informar, mediante un bando asinado polo alcalde Javier Fco. Caínzos Vázquez, de que o Mercado Gandeiro previsto para o domingo 23 de novembro de 2025 celebrarase sen presenza de vacún. A instalación abrirá unicamente para a compra e venda de gando equino e porcino, mentres que a participación de reses bovinas queda expresamente prohibida.
A medida responde á resolución da Dirección Xeral de Gandería, Agricultura e Industrias Agroalimentarias da Consellería do Medio Rural do pasado 12 de novembro, na que se establecen actuacións cautelares fronte á dermatosis nodular contaxiosa. O texto autonómico suspende, en todo o territorio galego, as feiras, concursos, certames, subastas, mercados e concentracións de gando bovino e fixa restricións adicionais aos movementos de vacún procedente doutras comunidades, incluíndo vixilancia veterinaria durante 21 días e obrigas de desinsectación tanto para os animais como para os vehículos de transporte. A resolución estará vixente do 17 ao 30 de novembro, con posibilidade de prórroga segundo evolucione a situación epidemiolóxica.
O Concello de Curtis adapta así o funcionamento do seu histórico mercado gandeiro ás directrices da Xunta, limitando unicamente o acceso do gando bovino e mantendo a actividade cos cabalos e porcos, especies non afectadas polas novas restricións. A decisión busca compatibilizar a prevención sanitaria coa continuidade dunha cita de referencia para os profesionais do sector da comarca.
A Consellería do Medio Rural insiste en que, ata o momento, non se detectou ningún caso de dermatosis nodular contaxiosa en Galicia e que a enfermidade non se transmite ás persoas nin afecta á seguridade alimentaria da carne ou do leite. As autoridades recomendan, con todo, extremar as medidas de bioseguridade nas explotacións, reducir ao imprescindible os movementos de gando bovino desde zonas de risco e comunicar de inmediato calquera síntoma sospeitoso aos servizos veterinarios oficiais.