O medio maratón da Coruña estreará meta na praza de María Pita na edición de 2026
O Concello da Coruña xa traballa no dispositivo de servizos para a próxima edición do medio maratón da cidade, a C21, que se disputará o domingo 1 de marzo de 2026 e traerá unha novidade destacada: por primeira vez, a liña de meta situarase na praza de María Pita, diante do Palacio Municipal.
A saída estará na avenida de Montoto e o trazado, xa pechado, levará as e os corredores por puntos emblemáticos do centro urbano e do litoral. O itinerario discorrerá pola avenida da Mariña e os Cantóns, pasará por prazas como Mina, Ourense ou Palloza e incluirá un tramo na zona portuaria, con paso por San Diego e o Peirao Leste nun segmento de ida e volta antes de regresar cara ao corazón da cidade. Na segunda metade da proba, o percorrido encamiñarase cara á contorna de Juana de Vega e San Andrés, seguirá pola rúa Alta e Pedro Barrié de la Maza e chegará á avenida de Buenos Aires e Manuel Murguía ata a rotonda das Escravas, onde se realizará o xiro para volver polo mesmo camiño. A recta final incluirá o paseo marítimo Francisco Vázquez e o tramo entre o Aquarium e Porta Real, ata culminar na praza de María Pita.
O concelleiro de Deportes, Manuel Vázquez, explicou que a definición do percorrido se concretou tras as últimas reunións coa Autoridade Portuaria e despois de analizar a evolución das obras nos Cantóns, unha zona clave por tratarse dun espazo chan, sen pendentes, necesario para a homologación oficial. A distancia total da C21, de 21.097,5 metros, conta xa coa validación da Real Federación Española de Atletismo (RFEA).
Xunto ao medio maratón, ese mesmo día celebrarase tamén unha carreira complementaria de 5 quilómetros. A 5K sairá igualmente desde a avenida de Montoto e compartirá o trazado coa C21 ata o cruzamento con Juana de Vega, onde se desviará por San Andrés para regresar cara ao centro por Alta, Barrié de la Maza, Sol, San Andrés e rúa Nova, atravesando Cantón Grande e a Mariña antes de alcanzar a meta en María Pita.
A dous meses e medio da cita, entre a C21 e a 5K xa hai máis de mil persoas inscritas, coa maior parte das prazas cubertas no medio maratón. As inscricións seguen abertas a través da web de Carreiras Galegas.