O médico Juan Luis Arévalo publica 'Trasplantado', un relato en primeira persoa tras case 30 anos cun corazón e un ril doados
'Podo morrer en calquera momento, pero non me vou facer un novo transplante: vivín o que me correspondía'. Con esta reflexión, Juan Luis Arévalo (Cáceres, 1954), médico que reside na Coruña e receptor dun transplante cardíaco e renal desde hai case tres décadas, dá a coñecer 'Trasplantado', un libro escrito en primeira persoa tras máis de tres anos de traballo.
A publicación propón un percorrido vital que vai máis alá do plano clínico. Segundo explica o autor, o volume afonda en como fortalecer a mente para transitar 'do límite ao renacer', combinando experiencia persoal, mirada sanitaria e unha dimensión máis íntima vinculada á resiliencia e á gratitude.
Arévalo tiña 43 anos cando unha insuficiencia cardíaca terminal o levou a un dobre transplante (corazón e ril) nunha mesma intervención. Antes diso pasou nove días na UCI con soporte vital, ata que a operación se converteu na única alternativa para sobrevivir. O libro revisita ese período, a recuperación posterior e a súa vida actual, marcada pola consciencia do presente.
O autor recoñece que durante anos ocultou a súa condición de trasplantado, ata asumir que compartir a historia podía servir de apoio e esperanza a outras persoas en situacións semellantes. 'Trasplantado' incorpora tamén información e datos sobre os transplantes en Galicia e en España e preséntase como o primeiro libro para persoas trasplantadas escrito desde a vivencia directa.
O volume repasa, ademais, etapas da súa traxectoria: os estudos en Cáceres, o traslado a Santiago para formarse en medicina e enfermaría, a súa etapa profesional na Coruña e en urxencias en Fene, e o cambio posterior cara á medicina preventiva tras o transplante. A obra estará dispoñíbel en castelán, galego e inglés, e o autor avanza tres títulos máis: unha guía profesional e reflexiva, un caderno de acompañamento e un terceiro libro con talleres prácticos.
A presentación terá lugar o 6 de febreiro, ás 19.30 horas, no Aula Magna do Colexio Oficial de Médicos da Coruña.