O medallista olímpico Carlos Arévalo acenderá o alumeado de Nadal en Betanzos
O Concello de Betanzos contará hoxe cun convidado de excepción para dar o pistoletazo de saída ás festas do Nadal. O betanceiro Carlos Arévalo, medallista olímpico en piragüismo, será o encargado de premer o interruptor do alumeado nun acto que se celebrará esta tarde, sábado 29, ás 19.00 horas, na praza Hermanos García Naveira.
No evento estará acompañado pola alcaldesa, María Barral, quen expresou o seu agradecemento ao deportista por aceptar 'o noso convite para unha xornada tan simbólica'. Ademais do acendido das luces, o programa inclúe música en directo e unha chocolatada coa que se agasallará ás nenas e nenos de Betanzos.
A rexedora salientou que 'é un orgullo contar cun betanceiro como Carlos Arévalo para o acendido do noso alumeado. Queremos recoñecer unha vez máis o traballo e os éxitos acadados por este betanceiro en todo o mundo'.
Este ano, o Concello contará con preto de 700.000 leds distribuídos en arredor de 4.600 metros cadrados de iluminación, co obxectivo de encher de ambiente festivo as rúas e prazas da cidade durante toda a campaña de Nadal.