Deputación | Deportes

A Deputación da Coruña celebra o xoves 5 de marzo, ás 19.00 h, a súa terceira xornada arredor das desigualdades de visibilidade, oportunidades e recoñecemento, con taller formativo e mesa redonda aberta ao público

A área de Deportes da Deputación da Coruña celebrará o vindeiro xoves 5 de marzo a III Xornada sobre a Brecha de Xénero no Deporte, unha cita enmarcada na programación do 8M (Día Internacional da Muller) que busca poñer o foco nas desigualdades que aínda persisten no ámbito deportivo e sumar propostas para avanzar cara a unha práctica máis igualitaria.

O encontro terá lugar a partir das 19.00 h no salón de actos do INEF de Bastiagueiro, no campus universitario, e reunirá profesionais de perfís diversos para analizar retos como a visibilidade do deporte feminino, o acceso a postos de responsabilidade técnica e directiva, as condicións de traballo e os obstáculos que seguen condicionando a igualdade real.

O deputado de Deportes, Antonio Leira, enmarcou a iniciativa no papel social do deporte e sinalou que aínda existen fendas en oportunidades e recoñecemento que cómpre corrixir, ao tempo que defendeu o compromiso institucional para impulsar o deporte feminino e garantir que nenas e mulleres conten coas mesmas opcións de acceso, participación e desenvolvemento en todos os niveis.

O programa arrancará ás 19.00 h coa presentación da xornalista deportiva Lucía Dávila. A continuación, a profesora da Universidade de Vigo e investigadora do CIDEGA Marian Fernández Villarino impartirá o taller ‘A bioloxía da muller e o adestramento deportivo. O principio de individualización’, centrado na necesidade de adaptar a preparación ás características fisiolóxicas femininas.

A partir das 19.45 h celebrarase unha mesa redonda con voces destacadas do deporte galego: a árbitra e exxogadora do Depor Abanca Miriam Ríos; o adestrador do BAXI Ferrol, Lino López; a psicóloga do deporte e adestradora de atletismo Mado González; e a xogadora do Marineda hóckey patíns e fisioterapeuta Alejandra Martín.

A Deputación anima á participación nunha xornada concibida para reflexionar, pero tamén para incorporar medidas e cambios sostidos no tempo, coa idea de que a igualdade no deporte non sexa unha reivindicación puntual, senón un compromiso continuado ao longo de todo o ano.