O Goberno reforza a Transición Xusta con novos investimentos en As Pontes, A Laracha e Monfero
O Boletín Oficial do Estado vén de publicar a concesión de 3,4 millóns de euros para financiar actuacións municipais enmarcadas nos convenios de Transición Xusta nas comarcas afectadas polo cambio enerxético. Os concellos beneficiados nesta nova resolución son As Pontes, A Laracha e Monfero, que destinarán os fondos á posta en valor do seu patrimonio e á mellora dos servizos veciñais.
As Pontes recibirá 1,55 millóns de euros para crear o Parque da Memoria Toxo Verde, un espazo que servirá para recuperar e preservar o legado industrial e mineiro do municipio. Pola súa parte, A Laracha contará con 1,38 millóns de euros destinados á rehabilitación do seu edificio interxeracional, que acollerá diferentes usos sociais e comunitarios. Finalmente, Monfero obterá preto de medio millón de euros para construír un novo centro social municipal, grazas á reasignación de fondos sobrantes da primeira convocatoria de axudas.
Coa publicación destas resolucións, o importe total concedido aos concellos galegos nas dúas convocatorias do Plan de Transición Xusta elévase ata os 15,3 millóns de euros, o que permitirá executar 19 proxectos en 16 municipios das provincias da Coruña e Lugo. A maior parte destas iniciativas xa están en marcha e deberán estar rematadas antes do 30 de xuño de 2026, prazo límite para xustificar os investimentos do Plan de Recuperación, Transformación e Resiliencia.