O globo de San Roque cumpre 150 anos e percorre 12 quilómetros ata caer en Crendes
Betanzos celebrou un dos momentos máis emblemáticos das súas festas coa solta do globo de San Roque, que este ano conmemora o seu 150 aniversario. O aerostato de papel elevouse desde a praza García Naveira e percorreu uns 12 quilómetros ata caer no encoro de Cecebre, en Crendes (Abegondo), baixo o seguimento de Protección Civil.
A cidade xa se prepara agora para a primeira jira a Os Caneiros, unha das citas máis multitudinarias das festas. Dende o mediodía, as embarcacións navegarán polo río Mandeo cara ao campo, animadas polas charangas NBA e DGT, mentres que no recinto actuará DJ Sebas. A verbena da noite correrá a cargo da orquestra New York na praza García Irmáns.
O Concello organizará un dispositivo especial de seguridade con máis dun cento de efectivos de Protección Civil, Cruz Vermella, Policía Local, Garda Civil e servizos municipais. Tamén haberá zódiacs no río e controis sobre a venda de alcohol a menores, así como prohibición de motos acuáticas.
Ademais, instalarase un Punto Violeta tanto na entrada a Os Caneiros como pola noite na praza García Naveira, co obxectivo de sensibilizar e ofrecer apoio fronte á violencia de xénero. A alcaldesa, María Barral, apelou ao respecto e á preservación desta romaría centenaria, avalada por colectivos e grupos políticos.