O Fórum Metropolitano abre o primeiro semestre con teatro familiar, artes escénicas e cinema
O Fórum Metropolitano pon en marcha este venres 16 de xaneiro a súa programación cultural do primeiro semestre, cunha axenda que combina cinema, teatro e artes escénicas para públicos de todas as idades. O concelleiro de Cultura e Turismo, Gonzalo Castro, destacou que a folla de ruta municipal pasa por achegar programación de calidade aos barrios e facilitar o acceso á cultura a toda a cidadanía.
O Concello sinala tamén que parte dos espectáculos contan coa colaboración da Rede Galega de Teatros e Auditorios, dentro dunha oferta que se estenderá ao longo dos próximos meses no auditorio e nas salas de cinema do Fórum.
No apartado familiar, o ciclo ‘Todo Público’ propón seis funcións pensadas para nenas e nenos, con pases abertos ás 18.00 horas e sesións escolares ás 10.00 e 12.00 horas. As entradas custan 6 euros e para menores de 3 anos o prezo é de 2 euros.
- Calendario do ciclo:14 de febreiro: ‘Pum!, Pum! Quen hai?’
- 28 de febreiro: ‘Carnaval animal’
- 28 de marzo: ‘Berenguela na gaiola’
- 25 de abril: ‘Teatro de papel’
- 16 de maio: ‘As palabras perdidas’
- 30 de maio: ‘Mr. Bo’
Para facilitar a asistencia do alumnado, o luns 19 de xaneiro ás 9.00 horas abrirase o prazo para que os centros do municipio se inscriban nas funcións escolares e o 21 de xaneiro para centros de fóra da cidade.
En paralelo, o ciclo ‘Sen Numerar’ ofrecerá seis propostas para público xuvenil e adulto, todas elas os venres ás 20.30 horas, con temáticas actuais: ciberacoso, bullying ou a reflexión sobre a lingua. A entrada xeral será de 9 euros.
Ademais, o Fórum acollerá unha nova edición do festival de narración oral ‘Falando a Boca Chea’, previsto para os días 15, 16, 17 e 18 de abril, con sesións para escolares, familias e público adulto en distintos espazos do recinto.
A programación complétase coa actividade habitual dos cines do Fórum, cunha oferta de películas de autor e en versión orixinal subtitulada. As instalacións contan con dúas salas e manteñen os seus prezos reducidos.