O Festival Herdanzas celebra a súa novena edición en Ordes con homenaxe ás cantareiras locais
O sábado 24 de maio, o auditorio María del Carmen Regueira Amor —na Casa da Cultura de Ordes— acollerá a novena edición do Festival Herdanzas, unha cita xa consolidada no calendario cultural da comarca e que dará comezo ás 17.00 horas.
Nesta ocasión, o evento contará coas actuacións dos grupos Tahúme, Embruxo Gaiteiros e a A.C. Camiño Real, auténticos referentes da música e tradición galega. Pero a edición deste ano terá un significado especial: o festival renderá homenaxe ás cantareiras de Ordes, en sintonía co recoñecemento que a Real Academia Galega lles brindou este ano con motivo do Día das Letras Galegas.
Como símbolo desa herdanza oral e musical, subirán ao escenario Mercedes, Lola e Flora, representantes dunha tradición viva que marcou xeracións a través da poesía popular e das coplas transmitidas de boca en boca.
O evento é posible grazas ao traballo continuado da Asociación Cultural Camiño Real e á colaboración do Concello de Ordes e da Deputación da Coruña, entidades comprometidas coa preservación e difusión do patrimonio inmaterial galego.
O Festival Herdanzas preséntase así como unha oportunidade para gozar da música tradicional e, ao mesmo tempo, recoñecer o valor das voces que mantiveron acesa a chama da cultura popular galega en Ordes.