O festival Guísamo Folk regresa a Bergondo o 23 de agosto cun cartel encabezado por Baiuca
O Campo da Feira de Guísamo, en Bergondo, acollerá o sábado 23 de agosto a XXIV edición do festival Guísamo Folk, unha cita xa consolidada no calendario cultural da provincia e que aposta pola fusión entre tradición e vangarda musical.
Nesta edición, o cartel está encabezado por Baiuca, o proxecto musical de Alejandro Guillán, que está a triunfar en todo o país cun estilo no que, segundo destacan desde a organización, "intenta achegar a tradición galega á vangarda e á electrónica", combinando instrumentos tradicionais con sintetizadores, caixas de ritmo e programacións.
O festival contará tamén coa actuación de Mondra, nome artístico de Martín Mondragón, de Teo, considerado unha das novas figuras do trad, un xénero que bebe da música tradicional galega para crear sons actuais.
Outro dos pratos fortes será o grupo De Vacas, formado por Inés Salvado, Faia Díaz, Paula Romero e Guillerme Fernández. Co seu espectáculo 'Rebovina Divas Live', fan unha homenaxe a divas do pop como Whitney Houston, Céline Dion, Mónica Naranjo ou Beyoncé, con músicas e bases electrónicas acompañadas de coreografías que definen como "espectaculares".
Completan o cartel os vigueses Abril, un trío composto por Claudia Abril (voz e percusión), Marina Carpente (violín e voz) e Antón Lago (guitarra e voz), cun proxecto que mestura músicas de raíz galega e ibérica con outros estilos contemporáneos.
Os concertos comezarán arredor das 20:00 horas, pero desde o Concello de Bergondo tamén haberá durante o día actividades e obradoiros infantís para que as familias poidan desfrutar da xornada completa.
Desde o Concello expresan o seu desexo de que "o festival volva ser todo un éxito, pois xa é un evento totalmente consolidado" e engaden: "intentamos, como xa fixemos noutras edicións, abarcar diferentes gustos musicais e que cada persoa poida gozar do festival á súa maneira". Tamén tiveron palabras de agradecemento para "veciños e veciñas, que sempre colaboran para que o festival sexa todo un éxito".