O festival DesOrdes Creativas lanza unha masterclass exclusiva con Yoseba MP
O Festival Internacional de Arte na Rúa / International Urban Art Festival DesOrdes Creativas pon en marcha unha actividade gratuíta e moi especial: unha masterclass co recoñecido artista muralista Yoseba MP, titulada “Retrato friki: Cando as series eran ao mediodía”.
Esta experiencia única celebrarase durante dous días, o venres 8 e o sábado 9 de agosto, en horario de 10.00 a 14.00 e de 17.00 a 19.00 horas (lugar aínda por definir). A iniciativa conta cunha capacidade moi limitada, só 8 prazas para participantes con experiencia ou formación en artes plásticas.
Yoseba MP, tamén coñecido como Yoseba Muruzábal, afincado en Santiago de Compostela, é un dos principais referentes da pintura mural en Galicia. O seu estilo destaca polo realismo combinado con toques surrealistas e un toque “friki”, reflectindo escenas cotiás con influencias fotográficas. Entre as súas obras máis emblemáticas atópase a serie ‘Fenómenos do rural’, na que homenaxea ás mulleres da sociedade galega converténdoas en superheroínas con poderes sobrehumanos.
A masterclass levará aos participantes a viaxar ás tardes dos anos 80 e 90, revivindo personaxes icónicos da televisión como Michael Knight, Steve Urkel, Magnum ou M.A. Barracus. Durante estas dúas xornadas, os asistentes poderán aprender técnicas de retrato e pintura rápida, elixindo crear o seu personaxe favorito, desde Alf ata Mitch Buchanan, pasando por Balki Baltokomus ou McGyver.
Para reservar praza, é necesario inscribirse a través do seguinte enlace: https://www.desordescreativas.com/masterclass