O fado toma o relevo en Perillo coa actuación de Carolina Varela Ribeiro
O XIII Ciclo de Música Voces Cálidas para Noites de Inverno encara a súa recta final este sábado 28 de febreiro coa presenza de Carolina Varela Ribeiro, unha intérprete de apenas 20 anos que chega a Perillo cun repertorio que bebe do fado máis clásico, pero tamén dunha curiosidade musical que a leva a explorar outros estilos.
A cita será ás 20.30 horas no auditorio do Centro Cultural A Fábrica. A organización mantén o sistema habitual de billetes: venda anticipada a través da plataforma Giglon e, o día do concerto, despacho aberto desde unha hora antes do inicio, cun prezo de 6,00 euros ata completar a capacidade da sala.
Nacida en Lisboa e criada en Benavente (Ribatejo), Carolina medrou entre guitarras e letras: é filla dos fadistas Ana Sofía Varela e Ricardo Ribeiro. Comezou moi nova na música, tocando piano e saxofón, e acabou levando a súa voz a algunhas das casas de fado máis coñecidas da capital portuguesa, como 'O Faia', 'Fama d’Alfama' e 'Mesa de Frades'.
Entre os fitos máis recentes, o Concello destaca a súa presenza no Festival Caixa Alfama no 2024 e a súa faceta como artista polifacética, xa que tamén compón e toca instrumentos como o piano e a viola.
O ciclo, programado integramente no auditorio da Fábrica, reuniu nesta edición nomes como La Habitación Roja e Sabela, e pecharase coa proposta fadista de Carolina Varela Ribeiro.