O Entroido de Samede preséntase no Concello de Paderne e apela ao relevo xeracional para manter viva a tradición
O baixo da Casa do Concello de Paderne acolleu a presentación do Entroido de Samede, que se festexará este domingo, 22 de febreiro, co tradicional desfile pola aldea que lle dá nome e con saída, como é costume, desde a igrexa.
O acto estivo conducido polo alcalde, Sergio Platas; a presidenta da Asociación do Entroido de Samede, Emilia Cagiao; e José Antonio Cagiao, testemuña dos primeiros anos nos que se desenvolveu esta celebración. Durante a presentación proxectouse un vídeo sobre este entroido, considerado o único que se mantén vivo na comarca das Mariñas.
Os tres intervincentes coincidiron en subliñar a importancia de seguir celebrándoo ‘non só por mantelo vivo, senón polo orgullo que temos dunha celebración moi nosa’. Ademais, puxeron o foco no futuro da festa e no relevo xeracional, destacando a presenza de nenas e nenos no acto como proba de que a continuidade está garantida.
Ao remate, as persoas asistentes puideron ver unha escolma de imaxes relacionadas co Entroido de Samede, que quedarán expostas temporalmente no vestíbulo do baixo do edificio consistorial.