O Eco Rallye A Coruña volverá á cidade no mes de setembro
![Imaxe da presentación do Eco Rallye A Coruña](https://acorunaxa.com/wp-content/uploads/2024/06/Imaxe-da-presentacion-do-Eco-Rallye-A-Coruna.jpg)
O Eco Rallye A Coruña prepárase para a súa oitava edición, que terá a súa saída na Praza de María Pita, o centro neurálxico da cidade herculina o vindeiro setembro.
Así o anunciaron o director da carreira, Alberto González Olañeta, xunto co concelleiro de Fomento e promoción da cidade da Coruña, Gonzalo Castro, e o concelleiro de Deportes, José Manuel Vázquez, despois de manter unha reunión para abordar diferentes aspectos da organización da cita, da que o Concello da Coruña volverá ser colaborador.
Segundo indicou González Olañeta, “estamos encantados de volver poder contar co apoio institucional do Concello, que durante todos estes anos estívonos axudando á hora de celebrar a competición”.
Engadiu que “durante as próximas semanas iranse desvelando máis detalles sobre a celebración do evento, que agora que alcanza o carácter de proba internacional, seguro que logra atraer miradas desde diferentes puntos do planeta”.
O Concello colaborou de forma continuada durante a celebración das 7 edicións anteriores da carreira, polo que continúa así o apoio local á proba deportiva.
A competición disputarase os días 20, 21 e 22 de setembro con distintos tramos que transcorrerán este ano por máis de 30 municipios da provincia, máis do dobre que o ano anterior.
Este ano o Eco Rallye A Coruña, ademais, estréase como proba puntuable para o Campionato do Mundo FIA Eco Rally Cup, o que supón un gran impulso a nivel internacional da proba.