O dúo La Plazuela actúa este luns nas Noites de María Pita
Este luns, 12 de agosto, regresan as Noites de María Pita tras unha pausa durante a celebración do Festival Noroeste Estrella Galicia. A partir das 22.00 horas subiranse ao escenario La Plazuela, que traerá á praza a música e ritmos do sur de España mesturados con electrónica.
A actuación forma parte do programa das Festas de María Pita 2024, co que o Goberno de Inés Rey busca actividades para todo tipo de públicos e idades, tamén na súa vertente musical, que reuniu na praza a artistas como Kate Ryan, Los Planetas ou Omar Montes durante as primeiras semanas de festexos. Nesta ocasión, a formación composta por Manuel Hidalgo e Luis Abril amosarán ao público coruñés a cultura popular andaluza, especialmente a granadina.
A súa música correspóndese coa reivindicación das súas raíces, empregando un discurso actual e renovado que ten como piares principais o flamento, a música electrónica e o nu funk. Presentarán na Coruña o seu último EP, ‘La Caleta’.
Tras eles, pecharán o ciclo Noites de María Pita o martes Ariel Rot e o mércores Budiño. Ambos concertos comezarán ás 22.00 horas.
Servizo especial de transporte
Co regreso das Noites de María Pita tamén volverá a habilitarse o servizo especial de transporte, que implica un reforzo das liñas de autobús operativas ao finalizar os concertos da praza. O dispositivo terá saídas centralizadas en Porta Real a partir das 23.30 e as liñas que se reforzarán serán as seguintes:
● Liña 1, con cobertura ás zonas da Palloza, A Gaiteira, Os Castros, O Castrillón e a avenida de Monelos.
● Liña 1-A, con cobertura ás zonas de Catro Camiños, a avenida Salvador de Madariaga, Matogrande e Eirís.
● Liña 3-A, con cobertura ás zonas de Labañou e Os Rosales.
● Liña 6, con cobertura ás zonas de Juana de Vega, praza de Pontevedra, avenida de Fisterra, O Ventorrillo e Meicende.
● Liña 7, con cobertura ás zonas de Juana de Vega, O Peruleiro, rolda de Outeiro, O Ventorrillo e Vila de Negreira.
● Liña 11, con cobertura ás zonas de Juana de Vega, praza de Pontevedra, Juan Flórez, Pla e Cancela e Os Mallos.
● Liña 21, con cobertura ás zonas de Ramón y Cajal, Pablo Picasso, O Birloque e Novo Mesoiro.