O Dépor abre ao público un museo en Riazor para revivir case 120 anos de historia
O Estadio Municipal de Riazor suma desde este martes un novo atractivo cultural e turístico coa inauguración do 'Dépor Museo & Tour', un espazo expositivo dedicado á traxectoria do Real Club Deportivo e á pegada social que o club deixou na cidade ao longo de case 120 anos. A apertura institucional contou coa presenza dos concelleiros Manuel Vázquez (Deportes) e Francisco Díaz (Urbanismo, Rehabilitación e Vivenda), en representación da alcaldesa, Inés Rey, desprazada a Andalucía polos actos do 45 aniversario da FEMP.
O Concello subliñou o valor do proxecto por engadir un novo punto de interese nunha instalación municipal emblemática. O museo, con acceso desde a rúa Manuel Murguía, combina elementos físicos e contidos audiovisuais e incorpora tamén materiais cedidos polo Arquivo Municipal.
Segundo informou o propio club, o 'Dépor Museo & Tour' ocupa 1.445 metros cadrados, exhibe máis de 250 pezas e aposta por un formato interactivo para reconstruír a memoria branquiazul. Ademais, convértese no primeiro museo deportivo integrado na rede de Centros Museísticos de Galicia, na que figuran 98 espazos.
O percorrido estrutúrase arredor de tres áreas (Sala Branca, Sala Dourada e Sala Azul). A primeira funciona como espazo de benvida de acceso gratuíto, con contidos sobre a evolución do estadio e iniciativas sociais da Fundación. A Sala Dourada afonda nas orixes do club (desde 1906) e na etapa histórica ata 1988. A Sala Azul céntrase na era contemporánea, cos sete títulos do Deportivo e lembranzas de noites europeas.
A experiencia complétase cun tour por zonas reservadas do estadio, desde vestiarios e sala de prensa ata a saída ao terreo de xogo. O museo abrirá ao público este xoves 26 ás 10.00, con horario continuo ata as 18.00, e o club prevé arredor de 40.000 visitantes ao ano, cun impacto estimado de 1,3 millóns de euros para a cidade.
As entradas estarán dispoñibles en modalidade de visita libre e visita guiada, con prezos que van desde 5 euros ata 21 euros segundo a opción e a idade, descontos para persoas abonadas e acceso gratuíto para menores de 4 anos.