O Consorcio As Mariñas prorroga por unanimidade o contrato de recollida do lixo ata que entre en vigor o novo
O pleno do Consorcio As Mariñas aprobou por unanimidade a prórroga do servizo de recollida e transporte de residuos urbanos para garantir a continuidade entre a fin do contrato vixente e a nova adxudicación. A extensión, que executará PreZero, arrancará o 1 de novembro e limitarase ao tempo estritamente necesario ata a posta en marcha do novo contrato, mantendo prestacións, frecuencias e medios. O servizo se presta por un total estimado anual de nove millóns cincocentos oitenta e dous mil setecentos setenta e tres euros e sesenta e tres céntimos, máis as cantidades pola xestión dos puntos limpos.
O presidente, José Antonio Santiso, explicou que a decisión procura asegurar a prestación ininterrompida dun servizo esencial e estabilidade para o persoal, e avanzou que os pregos se elevarán a pleno canto antes co obxectivo de mellorar aquilo máis demandado pola cidadanía. O ente supramunicipal convocará nos vindeiros días un encontro co comité de empresa da concesionaria para informar do proceso. Os pregos incluirán a división en lotes e reservarán un, o de recollida de enseres, para unha empresa de economía social. A previsión é que o novo contrato poida estar en vigor de cara á primavera ou verán de dous mil vinte e seis.
Ademais, o pleno deu luz verde á adhesión a tres convenios marco coa Consellería de Medio Ambiente da Xunta de Galicia para o tratamento de residuos de aparellos eléctricos e electrónicos, envases domésticos de vidro dun só uso e pilas e acumuladores. Estas colaboracións permitirán ao Consorcio recibir compensacións pola recollida, cumprir coas obrigas legais e contribuír á economía circular mediante reciclaxe e reutilización. Tamén se aprobou por unanimidade a conta xeral: segundo o interventor, a estabilidade orzamentaria quedou resolta co acordo extraxudicial coa concesionaria e a xestión é positiva, cun remanente de tesouraría de un millón seiscentos mil euros. No pleno participaron, xunto a Santiso, as alcaldías e representantes de Betanzos, Bergondo, Cambre, Carral, Sada e Oleiros.