O Conservatorio de Música de Culleredo acolle este sábado dúas funcións de Teatro El Ruiseñor
O auditorio do Conservatorio de Música de Culleredo converterase este sábado, 20 de decembro, nun dos escenarios culturais do Nadal co dobre pase de Teatro El Ruiseñor. A compañía porá en escena ‘Ebenezer Scrooge’, unha adaptación do clásico de Charles Dickens ‘Un conto de Nadal’ que chega cunha lectura máis lixeira e humorística.
As representacións están programadas para as 18.00 e as 20.30 horas e correrán a cargo de ‘A Troupe’, o grupo cómico da formación. A peza, escrita e dirixida por Susana Crespo, ten unha duración aproximada de 85 minutos e propón unha visión fresca e dinámica dunha historia ben coñecida polo público.
As entradas terán un prezo de 5 euros e poderán mercarse no Xardín Botánico do Burgo a partir deste xoves, en horario de 18.00 a 20.30 horas, tanto o xoves como o venres.
A obra xoga co propio funcionamento interno da compañía, xa que durante a función os actores, marcados polo seu humor habitual, as rivalidades e unha certa torpeza interpretativa, tentan evitar a súa tendencia a boicotear as súas propias montaxes. O resultado é un espectáculo orixinal que busca sorprender e facer rir ao público.